وآن الأوان - قصيدة الشاعر المصرى : محى سنبل
وآن الأوان - قصيدة الشاعر المصرى : محى سنبل
وآن الأوان . .
يدور الزمان . .
أسابق عنادى . .
وازاحم واضمـِّـك
يدوب اشتياقى اللى باقى . .
فى حـضــنك
ومن غير حدود . .
لقـلبــك يعــود . .
يساعى الوجود
يِوَحَّدْ قلوب اللى عاشوا بحبك
ويقوى بنبضك شعور الأمـان
وآن الأوان . .
يدور الزمان . .
على كل ظالم . .
تدور الـدواير
نرد المظـالم . .
وتيجى البشـاير
بنصر الغلابة . .
وأسـر الديابة . .
وتفرح قلوب النجوع والبنادر
يلاقى الحيارى فى قلبك مكان
...........................................
وآن الأوان . .
يدور الزمان
نحس المعانى ف كلام القصايد
وترسم حياتنا ف بيوتنا الجرايد
نعيش الحقيقة . .
مشاعر جريئة
نجاهر بحبك . .
ندوس ع الشدايد
وتعلا المـآذن بصـوت الأدان
.........................................
وآن الأوان . .
يواتى الزمان . .
واسجل فى رسمك . .
بإسمك حكاية . .
مداين جناين لأجمل مُنـــايا . .
وتبقى لحياتنا رسالة وغاية . .
مايحكمشى قيصر . .
فى قلب السراية
يكبل عبيده . .
تسبح لسيده
وننهى الوصاية . .
ونهتف " كفـــــــاية ". .
لكل اللى باعوا . .
وكل اللى خان
.................................
وآن الأوان . .
يدور الزمان
بأحلى الأمانى . .
اللى باتت عَصِيـَّة
تشوفك عِنَيَّـــا . .
صبيه بهية . .
كما المهرة يامصر . .
صاحية وجاَيَّه . .
تطوف ع البرارى . .
تخضر صحارى
ووسط المعارك قوية وعفية
ترجع شموخنا وتاريخنا اللى كان
وآن الأوان
هذا الموضوع قابل للنسخ .. يمكنك نسخ أى رابط من تلك الروابط الثلاثة ولصقه بصفحاتك على المواقع الإجتماعية أو بموقعك
URL: HTML link code: BB (forum) link code:
